बीरगंज २८ कात्तिक ।
लोकआस्था र निष्ठाको महान् पर्व छठलाई थप मर्यादित, सुरक्षित र व्यवस्थित बनाउन जिल्ला प्रशासन कार्यालय पर्साले कडा नियमहरू लागू गरेको छ। जिल्ला सुरक्षा समितिको निर्णयअनुसार प्रमुख जिल्ला अधिकारी भोला दाहालले सार्वजनिक अपिल जारी गर्दै कात्तिक २८ र २९ गते छठ पूजास्थल तथा घाट वरिपरिको क्षेत्रमा माछा, मासु र मादक पदार्थको बिक्री-वितरण तथा सेवनमा पूर्ण प्रतिबन्ध लगाएका छन्।
पर्वको पवित्रता र धार्मिक मर्यादा कायम राख्न छठ पूजा व्यवस्थापन समिति, व्यवसायी तथा सम्पूर्ण जिल्लावासीलाई प्रशासनले यो निर्णय पूर्ण रूपमा कार्यान्वयन गर्न आग्रह गरेको छ।
प्रशासनद्वारा जारी गरिएका प्रमुख निर्देशन तथा अपिलहरू:
-
माछा, मासु र मदिरा निषेध: छठ घाट र पोखरी वरपरको क्षेत्रमा कात्तिक २८ र २९ गते माछा, मासु र मादक पदार्थको बिक्री तथा सेवन गर्न पाइने छैन।
-
पटाका तथा विस्फोटक पदार्थमा प्रतिबन्ध: पर्वको समयमा आगलागी र अन्य मानवीय वा भौतिक क्षति हुन नदिन पटाकाजस्ता प्रज्वलनशील तथा विस्फोटक पदार्थको ओसारपसार, बिक्री र प्रयोगमा रोक लगाइएको छ। नियम उल्लङ्घन गर्नेलाई प्रचलित कानुनबमोजिम कडा कारबाही गरिनेछ।
-
सुरक्षा तथा सतर्कता: पोखरी तथा जलाशयहरूमा पूजाआजाका क्रममा बालबालिका, वृद्धवृद्धा र सर्वसाधारण डुब्न सक्ने जोखिमलाई मध्यनजर गर्दै उच्च सतर्कता अपनाउन अनुरोध गरिएको छ। सम्भावित विपद् तथा दुर्घटनाको तत्काल उद्धारका लागि सुरक्षाकर्मीहरू आवश्यक उपकरणसहित तयारी अवस्थामा राखिएको छ।
शान्ति सुरक्षालाई चुस्त र सुदृढ बनाउन स्थानीय प्रशासन, सुरक्षा निकाय र छठ पूजा व्यवस्थापन समितिहरूबीच निरन्तर समन्वय भइरहेको जनाउँदै प्रशासनले सबै जिल्लावासीलाई छठ पर्व भव्य, सभ्य र शान्तिपूर्ण रूपमा सम्पन्न गर्न सहयोग गर्न अपिल गरेको छ।
Comments
Post a Comment